स्याङ्जामा गरे दुई छोरीले आफ्नी आमाको काजक्रिया

पौष २९/स्याङ्जा:

स्याङ्जा जिल्लामा दुई छोरीले आफ्नी आमाको काजक्रिया सुरु गरेका छन्।

स्याङ्जा जिल्लाको भीरकोट नगरपालिका वडा नं १ निवासी पदम श्रेष्ठकी धर्मपत्नी विष्णु श्रेष्ठको निधन भएपछि उनका दुई छोरीहरुले आमाको काजक्रिया सुरु गरेका हुन्।

समाजमा काजक्रिया लगायतका कर्म गर्न छोरा नै चाहिन्छ भन्ने अन्धविश्वासलाई हटाउन आफूले क्रियाकर्म सुरु गरेको स्वर्गीय विष्णु श्रेष्ठकी कान्छी सुपुत्री निला श्रेष्ठले बताइन्।

छोरा नै चाहिन्छ भन्ने नकरात्मक सोचको दरिलो खण्डन गर्दै उनले समाजमा छोराछोरी बीच हुने भेदभावपूर्ण व्यबहारलाई अन्त्य गर्नुपर्छ भनेकी छन्।

छोराछोरी यदि बराबरी हुन् भने व्यबहारमै लागू हुनुपर्छ अनि मात्रै हाम्रो समाजको कुसंस्कार अन्त्य हुने उनको धारणा छ। मेरो यो कदमले अन्य छोरी मात्रै हुने आमाबुबा र छोरीहरूलाई थप प्रेरणा र उर्जा दिने विश्वास लिएकी छु। उनले भनेकी छन्।

उनकी आमा विष्णु श्रेष्ठको ५५ वर्षको उमेरमा २०७७ साल पौष २८ गते क्यान्सरका कारण निधन भएको हो।

स्वर्गीय विष्णु श्रेष्ठका श्रीमान पदमकुमार श्रेष्ठ आफैमा एक सामाजिक अभियन्ता हुन्। ५० वषको उमेरपछि विद्यालय गएर एसएलसी परीक्षा पास गरी क्याम्पस पढिरहेका उनले दुई छोरीको जन्म पश्चात परिवार नियोजन गरी समाजमा छोरीको छोरा समान महत्व रहेको बताउँदै आएका छन्।

Share Post on Social media
  •  
  •  
  •  
  •