खबरकलम संवाददाता /भीरकोट: राष्ट्रिय स्वतन्त्र पार्टी नेपालको दोस्रो स्थापना दिवसको अवसरमा रास्वपा स्याङ्जाद्वारा भीरकोटमा चियापान कार्यक्रम आयोजना गरी सम्पन्न गरिएको छ।

भीरकोट स्थित सिटी हलमा आज एक कार्यक्रमका बीच आफ्नो दोस्रो स्थापना दिवस मनाइएको राष्ट्रिय स्वतन्त्र पार्टी भीरकोटका अध्यक्ष सुरेश उचैं ठकुरीले जानकारी दिए। स्थापना भएकै साल राज्यको चौथो ठूलो दलका रुपमा उदाएको राष्ट्रिय स्वतन्त्र पार्टीले बलियो वैकल्पिक शक्तिको रुपमा आफूलाई उभ्याउन सफल भएको र आम जनताको मन जित्दै जनमैत्री काम गर्न आफूहरुले मिसन ८४ को नारा लिएर अघि बढेको उक्त कार्यक्रमका प्रमुख अतिथि तथा राष्ट्रिय स्वतन्त्र पार्टी नेपालका गण्डकी प्रदेश इन्चार्ज झविलाल डुम्रेले बताए।

विशिष्ट अतिथिको रुपमा बोल्दै जिल्ला समन्वय समिति स्याङ्जाका उपप्रमुख खड्कराज सुवेदीले जनतामा आधारित कार्यक्रम बनाएर घरघर पुग्नुपर्नेमा जोड दिंदै राष्ट्रिय स्वतन्त्र पार्टीले आफ्ना आाधिकारिक दस्तावेज, घोषणापत्र तथा नीति तथा कार्यक्रमहरु सार्वजनिक गर्न जोड दिए।

उक्त चियापान कार्यक्रममा विभिन्न राजनीतिक दलका प्रतिनिधिले शुभकामना व्यक्त गरेका थिए। नेपाली कांग्रेस भीरकोट नगर सभापति यामप्रसाद अधिकारी (लक्ष्मण), नेकपा एमाले भीरकोटका अध्यक्ष हर्क गुरुङ, नेकपा माओवादी केन्द्र भीरकोटका अध्यक्ष मिनप्रसाद कोइराला लगायतले राष्ट्रिय स्वतन्त्र पार्टीको भविष्य सुनौलो रहेकाले जनपक्षीय भएर काम गर्न शुभकामना सहित शुभेच्छा प्रकट गरे।

स्थानीय स्तरमा सक्रिय राजनीतिक दलका अतिरिक्त आमा समूह, युवा क्लब, लायन्स क्लब, उद्योग वाणिज्य संघ भीरकोटका प्रतिनिधि, समाजसेवी, पत्रकारहरु समेत उपस्थित उक्त कार्यक्रमको सञ्चालन डा. तुलसी प्रवास खनालले गरेका थिए भने सभापतित्व राष्ट्रिय स्वतन्त्र पार्टी नेपाल स्याङ्जाका अध्यक्ष रुक्मांगद भण्डारीले गरेका थिए।