खबरकलम संवाददाता /स्याङ्जा: राष्ट्रिय स्वतन्त्र पार्टीका सभापति एवम् पूर्वउपप्रधान तथा गृहमन्त्री रवि लामिछाने स्याङ्जा आउने भएका छन्।

स्याङ्जा र पाल्पामा आयोजित चुनावी कार्यक्रममा सहभागी हुन सभापति लामिछाने स्याङ्जा आउने र सो पश्चात पाल्पा पुग्ने उनको तयारी छ। लामिछानेले स्याङ्जाको फेदीखोला, पुतलीबजार, भीरकोट, वालिङ, चापाकोट र गल्याङमा संक्षिप्त सम्बोधन गर्ने समेत तयारी गरिएको राष्ट्रिय स्वतन्त्र पार्टी स्याङ्जाले जनाएको छ।
रास्वपा स्रोतका अनुसार भोलि बिहीबार दुई बजे वालिङ मोडमा सम्बोधन गर्ने कार्यक्रम रहेको रास्वपा वालिङ सभापति सुरेन्द्र काफ्लेले जानकारी दिए। उनी वालिङ, गल्याङ हुँदै चापाकोट जानेछन् र त्यसपश्चात पाल्पा पुग्नेछन्।

फागुन २१ गते हुन लागेको प्रतिनिधिसभा सदस्य निर्वाचनमा विभिन्न राजनीतिक दलका प्रतिनिधिहरुले आफ्नो उम्मेदवारी दिएका छन् भने चुनावी प्रचारप्रसारमा समेत लागिरहेका छन्।