खबरकलम संवाददाता/स्याङ्जा: स्याङ्जाको अर्जुनचौपारी गाउँपालिकामा रहेको नेपालकै पहिलो नवग्रह मन्दिरमा महाशिवरात्रीको अवसरमा जिल्लामै पहिलो पटक अन्तरविद्यालय भजन प्रतियोगिता आयोजना गरिने भएको छ।

अर्जुनचौपारी गाउँपालिकाको वार्षिक कार्यक्रम अन्तर्गत फागुन ३ गते बिहान १० बजेदेखि ‘प्रथम स्याङ्जा अन्तर विद्यालयस्तरीय भजन प्रतियोगिता’ सञ्चालन हुने गाउँपालिकाले जनाएको छ । विद्यार्थीमा रहेको अन्तर्निहित प्रतिभा उजागर गर्दै मौलिक संस्कार, संस्कृति र आध्यात्मिक चेतनाको प्रवर्द्धन गर्ने उद्देश्यले प्रतियोगिता आयोजना गर्न लागिएको गाउँपालिका अध्यक्ष प्रकाश तिवारीले जानकारी दिए ।

प्रतियोगितामा स्याङ्जा जिल्लाभित्रका सामुदायिक तथा निजी विद्यालयले सहभागिता जनाउन सक्नेछन् । प्रस्तुत गरिने भजनमा अर्जुनचौपारी र स्याङ्जाको धार्मिक पर्यटन, स्थानीय मौलिकता, आध्यात्मिक भाव र नैतिक सन्देश झल्किनुपर्ने गाउँपालिकाको भनाइ छ । परम्परागत भजन–कीर्तनलाई प्राथमिकता दिइनेछ ।

प्रतियोगितामा प्रथम हुने समूहलाई २५ हजार, द्वितीयलाई १५ हजार र तृतीयलाई १० हजार रुपैयाँ पुरस्कार प्रदान गरिनेछ । विद्यार्थीहरूले भजनको गरिमा झल्किने मौलिक वा विद्यालयको औपचारिक पोशाक लगाउनुपर्नेछ । गाउँपालिकाले ‘मौलिक संस्कृति र आध्यात्मिक चेतनाको प्रवर्द्धनमा हाम्रो प्रतिबद्धता’ भन्ने नारासहित कार्यक्रम आयोजना गर्न लागेको जनाएको छ ।

यसैबीच, महाशिवरात्रीको अवसरमा नवग्रह मन्दिरमा विशेष पूजा कार्यक्रम पनि आयोजना गरिने मन्दिर व्यवस्थापन समितिले जनाएको छ । गत वर्ष महाशिवरात्रीकै दिन प्राणप्रतिष्ठा सम्पन्न भएको मन्दिरमा यस वर्ष नौ लाख ९९ हजार ९९९ दीप प्रज्वलन समेत गरिने छ।

यसअघि पनि नवग्रह मन्दिरमा करोड बत्ती समेत प्रज्वलन गरी पूजाआजा गरिएको थियो। हरेक शनिबार देशका विभिन्न स्थानबाट श्रदालु भक्तजनहरूको बाक्लो उपस्थिति यस मन्दिरमा रहँदै आएको छ।