खबरकलम संवाददाता/स्याङ्जा: स्याङ्जा जिल्लाको बिरुवा गाउँपालिकाले वडा नं. ६ चिन्नेवासस्थित बिरुवा आधारभूत अस्पताल सञ्चालनमा आएको छ।

स्वास्थ्य सेवा विस्तार गर्दै गाउँमै ओपीडी, आकस्मिक, एक्स–रे, भिडियो एक्स–रे तथा CBC, LFT, RFT लगायतका प्रयोगशाला परीक्षण सेवाहरू सञ्चालनमा ल्याएको छ । सो अस्पतालको आज मिति २०८२ साल मंसिर २१ गते गण्डकी प्रदेशका स्वास्थ्य मन्त्री माननीय कृष्ण प्रसाद पाठकले एक कार्यक्रमकाबीच उद्घाटन गरेका हुन्। उक्त अवसरमा अध्यक्ष श्री सूर्य बहादुर कुँवरले अस्पताल सञ्चालनको उद्देश्य “गाउँमा स्वास्थ्य चेतना, सहज पहुँच र आपतकालीन अवस्थामा तत्काल उपचार सुनिश्चित गर्नु भएको बताए।

अस्पतालमा हाल एम.वि.वि.एस. डाक्टर, रेडियोग्राफर सुपरभाइजर, हेल्थ असिस्टेन्ट, ल्याब टेक्निसियन, स्टाफ नर्स, अनमी, अहेव र फर्मेसी सुपरभाइजर गरी नौ जना स्वास्थ्यकर्मी खटाइएका छन् । साविक चिन्नेवास गा.वि.स. थाँतथलो रही हाल नेपालका विभिन्न ठाउँमा छरिएर बसेका व्यक्तिहरु संगठित भएर बनेको “सामाजिक विकासका लागि सहयोगी हातहरु” नामक संस्थाले अस्पताल सञ्चालनको लागी सुविधा सम्पन्न भवन निर्माण गरी सोही स्थानमा रहेको चिन्नेवास स्वास्थ्य चौकीलाई हस्तान्तरण गरेको थियो । अहिले सोहि भवनमा अस्पताल सञ्चालन गरिएको छ । अस्पताल सञ्चालनका लागि आवश्यक पर्ने थप भौतिक पूर्वाधार भने गत आर्थिक वर्षमा बिरुवा गाउँपालिकाले आफ्नै स्रोतबाट निर्माण सम्पन्न गरेको थियो ।

स्थानीयवासीहरूका अनुसार, अस्पतालमा स्वास्थ्य सेवा विस्तार भएपछि सामान्य उपचारका लागि समेत पोखरा लगायत राजधानी धाउनुपर्ने बाध्यताको अन्त्य भएको छ । विशेषगरी आकस्मिक उपचार, गर्भवती महिला र बालबालिकाको स्वास्थ्य परीक्षण गाउँमै उपलब्ध भएपछि जनजीवनमा सहजता आएको छ । गाउँपालिकाले आगामी वर्ष अस्पतालका सेवाहरु थप गरी अल्ट्रासोनोग्राफी तथा दन्त सेवा थप्ने तयारी गरेको जनाएको छ, जसले बिरुवाबासीको स्वास्थ्य क्षेत्रमा दीर्घकालीन सकारात्मक परिवर्तन ल्याउने अपेक्षा गरिएको छ ।