खबरकलम संवाददाता/स्याङ्जा: अर्जुनचौपारी गाउँपालिकाद्वारा आयोजना गरिएको प्रजनन स्वास्थ्य रुग्णताको स्क्रिनिङ शिविर सम्पन्न भएको छ। 

अर्जुनचौपारी गाउँपालिकाका ६ वटै वडामा फरक दिन र फरक स्थानमा आयोजना गरिएको उक्त शिविरमा १००६ जना महिलाहरुको प्रजनन स्वास्थ्यसम्बन्धी निशुल्क स्वास्थ्य परीक्षण गरिएको थियो। 

अर्जुनचौपारी गाउँपालिकाले महिलाको स्वास्थ्यलाई प्राथमिकतामा राख्दै गाउँपालिकाका सबै वडामा माघ १२ गतेदेखि माघ १८ गतेसम्म प्रजनन स्वास्थ्य सम्बन्धी निःशुल्क स्क्रिनिङ तथा उपचार सेवा सञ्चालन गरेको थियो। गाउँमै पुगेर समयमै जाँच र उपचारको व्यवस्था गरिँदा सेवाग्राहीहरू प्रत्यक्ष लाभान्वित भएको प्रजनन स्वास्थ्य परीक्षण गर्न आउने महिलाहरुको भनाई छ। महिलाको स्वास्थ्य सुरक्षित गर्न र गुणस्तरीय सेवा प्रवाहलाई थप प्रभावकारी बनाउन गाउँपालिका निरन्तर प्रतिबद्ध रहेको गाउँपालिका अध्यक्ष प्रकाश तिवारीले जानकारी दिए। 

“सुरक्षित नारी, समुन्नत अर्जुनचौपारी : समयमै जाँच र उपचार हाम्रो जिम्मेवारी” भन्ने मुल नाराका साथ उक्त शिविर सञ्चालन गरिएको थियो। उक्त शिविरमा स्वास्थ्य परीक्षणका क्रममा पाठेघरको मुखको संकास्पद क्यान्सर लक्षण देखिएका ९ जनालाई थप सहायताको निम्ति रिफर गरिएको थियो भने ३५ जनाको आङ खस्ने समस्या व्यवस्थापन गर्न रिङ पेसरी राखिएको थियो। 

यस्तै गरी स्तनमा समस्या देखिएका ३५ जना र पाठेघरमा मासु पलाएका ३२ जनालाई समेत थप उपचारका लागि रिफर गरिएको थियो।