लायन्स क्लब अफ गण्डकी आँधीखोलाको परिचयात्मक कार्यक्रम सम्पन्न

भदौ १२/राजनप्रसाद पौडेल: स्याङ्जा जिल्लाको भीरकोट नगरपालिका वडा नं १ स्थित श्रेष्ठ होटलको सभाहलमा लायन्स क्लब अफ गण्डकी आँधीखोलाले नयाँ सदस्यहरुबीच परिचयात्मक कार्यक्रम आज सम्पन्न गरेको छ।

लायन्स क्लब अफ पोखरा फेवा बेगनास चौतारीको संयोजनमा गरिएको उक्त कार्यक्रममा सदस्यबीच परिचयका साथै एक दिने लायन्स प्रशिक्षण समेत दिइएको थियो।‌ उक्त कार्यक्रमको अध्यक्षता पोखरा फेवा बेगनास चौतारीका लायन वर्ष २०२० – २०२१ का अध्यक्ष महेश्वर रिमालले गरेका थिए । प्रमुख अतिथिको रुपमा उपस्थित भएका कलष्टर प्रमुख मधुसूदन कोइरालाले सहभागी लायन्स सदस्यहरुलाई ओरियन्टेसन दिदैं लायन्स क्लब एउटा अन्तर्राष्ट्रिय सामाजिक सेवाको भावनाले ओतप्रोत भएको विशुद्ध राजनीतिरहित संस्था भएको र यो संस्थामा आबद्ध हुन चाहने र भएका सदस्यले स्वयंसेवक रुपमा मानव कल्याणको काममा लाग्नुपर्ने बताएका थिए ।

त्यसैगरी अर्का प्रशिक्षक सन्तोष घिमिरेले पनि क्लबको बारेमा जानकारी गराएका थिए। विश्वका २१२ भन्दा बढी देशमा १४ लाख भन्दा बढी सदस्यहरु रहेको र ४८००० शाखा संजालसहित समाज सेवा, आपतकालीन उद्धार, रक्तदान, स्वास्थ्य सेवा, वातावरण संरक्षण लगायतका क्षेत्रमा सकृयताका साथ काम गरिरहेको संस्थामा जोडिएर काम गर्न पाउनु आफैमा एक चुनौति र अवसर रहेको बताउँदै आफ्नो तर्फबाट सक्दो सहयोग गरिरहने सन्तोष घिमिरेको भनाइ थियो।‌‌

नवगठित लायन्स क्लब अफ गण्डकी आँधिखोलाका अध्यक्ष लायन जीवन अर्याल, सचिव सन्दिप काफ्ले र कोषाध्यक्ष रेशम देवकोटालाई प्रमुख अतिथिद्वारा लायन्सको लोगो अंकित ब्याच लगाएर बधाइ तथा शुभकामना दिइएको उक्त कार्यक्रममा विभिन्न पेशा, व्यापार, व्यवसाय तथा उद्योग गरेका व्यक्ति, पत्रकार, शिक्षक, कर्मचारी र राजनीतिकर्मी समेतको उपस्थिति थियो ।

करिब ३ घण्टा चलेको उक्त कार्यक्रमको अन्त्यमा नवगठित लायन्स क्लब गण्डकी आँधीखोलाका अध्यक्ष जीवन अर्यालले उपस्थित सबैलाई धन्यवाद दिएका थिए भने कार्यक्रमको संचालन लायन क्लब पोखरा फेवा चौतारीका पिआरओ टंकप्रसाद ढकालले गरेका थिए।

Share Post on Social media
  •  
  •  
  •  
  •