असार १०/खबरकलम संवाददाता: गल्याङ नगरपालिकाले आज आफ्नो १९ औं नगरसभा सम्पन्न गरेको छ।

गल्याङ नगरपालिकाको आर्थिक वर्ष २०८३/०८४ को नीति तथा कार्यक्रम तथा वार्षिक बजेट प्रस्तुतिसहित १९ औँ नगरसभा आज सम्पन्न गरिएको हो।

नगरसभामा आगामी आर्थिक वर्षका विकास निर्माण, शिक्षा, स्वास्थ्य, कृषि, पर्यटन, पूर्वाधार तथा सुशासनका विविध प्राथमिकताहरू समेटिएको नीति तथा कार्यक्रम र बजेट गल्याङ नगरपालिकाकी नगर उपप्रमुख हेमा न्यौपानेले प्रस्तुत गरेकी हुन्।

गल्याङ नगरपालिकाको बजेटको सिलिङ रु ८६ करोड ६३ लाख ५० हजार रहेको छ। उक्त बजेटको सिलिङ अनुसारको वार्षिक बजेट विनियोजित गर्दै नगरसभाले “दिगो विकास, व्यवस्थित सहर र समृद्ध गल्याङ” को लक्ष्यलाई आत्मसात गर्दै नागरिकको जीवनस्तर उकास्ने, उत्पादन र रोजगारी वृद्धि गर्ने तथा समावेशी विकासलाई थप प्रभावकारी बनाउने प्रतिबद्धता व्यक्त गरेको छ।