खबरकलम संवाददाता /स्याङ्जा:  बढ्दो बसाइँसराइ र बजार केन्द्रित रहनसहनका कारण देशको अधिकांश विद्यालयमा विद्यार्थी कम भैरहेको अवस्थामा स्याङ्जा जिल्लाको भीरकोट नगरपालिकामा समेत यसको प्रत्यक्ष असर देखिएको छ।

भीरकोट नगरपालिकाका विभिन्न वडामा रहेका विद्यालयहरु विद्यार्थी अभावमा तह घटुवा र समसयोजनको संघारमा पुगेका छन्। भीरकोट नगरपालिकामा रहेका नौ वटा आधारभूत विद्यालयलाई समायोजन गरी बाल विकास केन्द्र मात्रै कायम गरिएको छ । जसमा वडा नं. ३ मा रहेको २ वटा, ७ का २ वटा र वडा नं. ८ का ५ वटा विद्यालय समायोजन गरिएको हो। वडा नं. ३ का जनविकास आधारभूत विद्यालय(रोजिखोला) र बटुकभैरव आधारभूत विद्यालय(बजारानी), वडा नं. ७ का बाघ भैरवी आधारभूत विद्यालय(चिउरीखर्क) र कालिका आधारभूत विद्यालय(खिलुङ) समायोजनमा परेका हुन् ।

यस्तै, समायोजनमा पर्नेमा वडा नं. ८ का अमर आधारभूत विद्यालय(पखेरे), प्रगतिशील आधारभूत विद्यालय (शालिकोश),रत्न देवीस्थान आधारभूत विद्यालय(खोरबार), सरस्वती आधारभूत विद्यालय(चिलाउनेखार्क) र देउराली भन्ज्याङ आधारभूत विद्यालय (सिरूखर्क) रहेका छन् ।

वडा नं. १ मा रहेको रानीरह आधारभूत विद्यालयलाई सोही वडाको  लक्ष्मी आधारभूत विद्यालय (गजौंदी) मा समायोजन गरिएको छ ।वडा नं. ९ को भविष्य निर्माण आधारभूत विद्यालयलाई कक्षा घटुवा गरी १-३ कायम गरिएको छ ।

भीरकोटबाट अधिकांश विद्यार्थी वालिङ नगरपालिकास्थित विद्यालयमा अध्ययन गर्नका लागि जाने गरेका छन्।