राम बहादुर रोकाहा/वैशाख १४: स्याङ्जाको पुतलीबजार नगरपालिका पूर्ण खोप सुनिश्चितता नगर घोषित भएको छ । नगरपालिकाको सभाहलमा आयोजित कार्यक्रममा पूर्ण खोप सुनिश्चितता तथा दिगोपनाका लागि प्रतिबद्धता गरिएको हो ।

पालिकालाई `शिक्षा स्वास्थ्य र पुर्वाधार समुन्नत पुतलीबजारको आधार, स्थानीय स्रोतको उपयोग, स्वामित्व र सहभागिता, पूर्ण खोप सुनिश्चितता हाम्रो प्रतिबद्धता´ भन्ने मुल नारासहित पूर्ण खोप सुनिश्चितता नगर घोषित गरिएको हो ।

पालिकाभित्रका सबै बालबालिकालाई पाउनुपर्ने खोप उपलब्ध गराइसकेपछी पूर्ण खोप सुनिश्चितता नगर घोषणा गरिएको नगरप्रमुख तुलसीराम रेग्मीले जानकारी दिए । उनले घरधुरी सर्वेक्षणपछि नगरभित्र १६ देखि ५९ महिनासम्मका बालबालिकालाई १५ महिनाभित्र ७ पटकमा १३ प्रकारका खोप लगाइएको बताए । नगरप्रमुख रेग्मीले राज्यले बाल मृत्युदर घटाउनका लागि हजारौं लगानी गरेको बताउँदै उपयोग गरि स्वास्थ्य लाभ लिन सुझाव दिए ।

उक्त कार्यक्रममा राष्ट्रिय खोप तालिकाअनुसार नगरभित्रका सबै बालबालिकालाई खोप उपलब्ध गराउनुपर्नेमा नगर उपप्रमुख देवी अर्यालले जोड दिएकी थिइन् ।

पुतलीबजार नगरपालिका स्वास्थ्य शाखाले नगरभित्रका १६ देखि ५९ महिनासम्मका एक हजार ८२२ जना बालबालिकालाई पूर्ण खोप लगाइएको जनाएको छ । नगर स्वास्थ्यको तथ्यांकअनुसार नगरभित्र वर्षेनि चार सय देखि पाँच सयसम्म शिशु जन्मने बताइएको छ ।