राम बहादुर रोकाहा/जेठ १: सवारी दुर्घटना न्यूनीकरणका लागि जनसचेतना जगाउने उद्देश्यका साथ स्याङ्जामा संचालन भएको ट्राफिक सप्ताह कार्यक्रम हिजोदेखी सकिएको छ ।

`सेफ ड्राइभ, लङ लाइफ´ भन्ने मुल नारासहित जिल्ला प्रहरी कार्यालय र जिल्ला ट्राफिक प्रहरी कार्यालय स्याङ्जाको आयोजनामा सडक अनुशासन तथा सवारी दुर्घटना न्यूनीकरणका लागि ट्राफिक सचेतना जगाउने उद्देश्यले प्रदेश स्तरीय ट्राफिक सप्ताह -२०८१ मंगलबारदेखी सुरु भएको थियो ।

ट्राफिक सप्ताह समिक्षा तथा समापन समारोहका प्रमुख अतिथी जिल्ला प्रहरी कार्यालय स्याङ्जाका प्रमुख प्रहरी उपरीक्षक शालिग्राम शर्माले सडक अनुशासन तथा सवारी दुर्घटना न्यूनीकरणका लागि ट्राफिक र प्रहरीले चालेका केही संस्थागत र नीतिगत व्यवस्थाका साथै सचेतनाका लागि गरिएका कार्यक्रमहरुको बारेमा जानकारी दिएका थिए ।

गण्डकी प्रदेश प्रहरी कार्यालय, पोखरा र स्याङ्जा जिल्लाका ११ पालिकाहरुको संयुक्त समन्वयमा सम्पन्न भएको सप्ताह अवधीभर गरिएका जनसचेतनामुलक कार्यक्रमहरुले मानव जीवन रक्षाका लागि सेवा प्रवाहमा थप टेवा पुग्ने प्रहरी उपरीक्षक शर्माले बताए ।

उनले वैशाख २५ गतेदेखि सुरु भएको उक्त कार्यक्रमबाट एक साताभित्र प्रत्यक्ष रुपमा ३२ हजार जना बढी सर्वसाधारणहरु लाभान्वित भएको बताउँदै सडक तथा सवारी दुर्घटना न्युनिकरणका लागी ट्राफिक सप्ताह सफलताका साथ सम्पन्न भएको बताए ।

सप्ताहव्यापी जनसचेतना कार्यक्रम अन्तर्गत विद्यार्थी, पैदलयात्री र चालकहरुलाई ट्राफिक सचेतना, ट्राफिक नियम तथा जेब्राक्रस बारेमा प्रशिक्षण प्रदान, पर्चा पम्प्लेटहरु वितरण, पैदल यात्रा गर्दा फुटपाथ प्रयोग लगायतका विषयमा जानकारी गराइएको ट्राफिक प्रहरी कार्यालय स्याङ्जाका प्रमुख प्रहरी नायब निरीक्षक केशर बहादुर मल्लले जानकारी दिए ।

सोही कार्यक्रममा ट्राफिक सप्ताहमा प्रत्यक्ष रुपमा सहयोग पुर्याउने संघसंस्था एवं व्यक्तिहरुलाई कदर पत्र प्रदान गरिएको थियो भने सवारी दुर्घटनामा मृत्यु भएकाहरुप्रती श्रद्धाञ्जली अर्पण गर्दै दिप प्रज्वलन समेत गरिएको थियो ।

स्याङ्जाका प्रहरी प्रमुख शालिग्राम शर्माको अध्यक्षतामा सम्पन्न भएको कार्यक्रममा नेपाल पत्रकार महासंघ स्याङ्जाका अध्यक्ष श्रीकृष्ण सिग्देलले शुभकामना ब्यक्त गरेका थिए भने प्रहरी निरीक्षक पावल सिंह लामाले कार्यक्रम सञ्चालन गरेका थिए ।