खबरकलम संवाददाता/असोज ४: स्याङ्जा जिल्लाको पुतलीबजार नगरपालिका र फेदीखोला गाउँपालिकाको सिमानामा अवस्थित पर्यटकीय स्थल भालुपहाडमा नयाँ झण्डा फेरिएको छ।

भीरकोट युवा आवाज र पहिलो पाइला नेपाल स्याङ्जा शाखाको संयोजनमा त्यहाँ राखिएको पूरानो राष्ट्रिय झण्डाको ठाउँमा नयाँ राखिएको हो। राष्ट्रिय झण्डा पूरानो भएर च्यातिएको भएपनि स्थानीय निकायको ध्यान त्यता गएको थिएन।

सिदार्थ राजमार्ग छेवैमा अवस्थित यस स्थल युवायुवतीको लागि विशेष प्रख्यात छ। यात्रुहरु रोकिएर सेल्फी खिच्ने क्रम बढेकोले यस ठाउँको नाम नै सेल्फी डाँडा पनि राखिएको छ।

यस ठाउँले पर्यटनलाई विशेष टेवा पुर्याउने संभावना बोकेको छ। पहाडको तल बगेको घुमाउरो सेतीखोला, अग्ला-अग्ला पहाड, समथर मैदान यस ठाउँका विशेषता हुन्। थुप्रै नेपाली चलचित्रहरूमा समेत यस ठाउँको दृश्य देख्न सकिन्छ।