खबरकलम संवाददाता /जेठ १६: दक्षिण एशियाली ज्योतिष महासंघको सातौं केन्द्रीय महासभाबाट अध्यक्ष पदमा डा.सहदेव विष्ट,युवा ज्योतिषी अनुसन्धानकर्ता, संगठन अभियन्ता तथा सामाजिक व्यक्तित्व रविन पंगेनी सर्वसम्मत रूपमा महासंघको केन्द्रीय महासचिव पदमा र कोषाध्यक्ष पदमा आचार्य लक्ष्मण गौतम निर्वाचित भएका छन्। काठमाडौं स्थित होटल पेन्सन वासनामा सम्पन्न महासभाले पंगेनीको नेतृत्व क्षमता, संगठन निर्माणमा पुर्‍याएको योगदान तथा ज्योतिष क्षेत्रको विकासमा देखाएको सक्रियतालाई मूल्याङ्कन गर्दै सार्क स्तरीय महासचिवको जिम्मेवारी प्रदान गरेको हो।

महासभामा नेपालसहित भारत, बंगलादेश, भुटान, श्रीलंका तथा दक्षिण एशियाका विभिन्न राष्ट्रका ज्योतिषविद्, वास्तु विशेषज्ञ, पञ्चाङ्गविद् तथा आध्यात्मिक अभियन्ताहरूको उल्लेखनीय सहभागिता रहेको थियो। महासभाले ज्योतिष विज्ञानको संरक्षण, अनुसन्धान, अन्तर्राष्ट्रिय सहकार्य तथा युवा पुस्तामा ज्योतिषप्रतिको आकर्षण बढाउने विषयलाई प्राथमिकताका साथ अघि बढाउने निर्णय गरेको छ।

नवनिर्वाचित महासचिव पंगेनीले ज्योतिषलाई केवल परम्परागत विश्वासको विषयका रूपमा नभई अनुसन्धान, दर्शन, संस्कृतिसँग जोडिएको वैज्ञानिक एवं आध्यात्मिक अध्ययनको क्षेत्रका रूपमा स्थापित गर्न आफू प्रतिबद्ध रहने बताएका छन्। उनले दक्षिण एशियाली राष्ट्रहरूबीच ज्योतिषीय ज्ञान आदान–प्रदान, संयुक्त अनुसन्धान तथा अन्तर्राष्ट्रिय सम्मेलनहरूलाई अझ प्रभावकारी बनाउने योजना प्रस्तुत गरेका छन्।

रविन पंगेनी विगत १ दशक भन्दा बढी समयदेखि ज्योतिष, वास्तु, सनातन संस्कृति संरक्षण तथा सामाजिक जागरणका क्षेत्रमा सक्रिय रहँदै आएका व्यक्तित्वका रूपमा परिचित छन्। उनले विभिन्न राष्ट्रिय तथा अन्तर्राष्ट्रिय सम्मेलन, गोष्ठी तथा प्रशिक्षण कार्यक्रमहरूमा सहभागिता जनाउँदै ज्योतिषीय चेतना विस्तारमा महत्वपूर्ण भूमिका निर्वाह गरेका छन्।
दक्षिण एशियाली तथा अन्तर्राष्ट्रिय ज्योतिष सम्मेलनहरूमा विभिन्न अवार्ड
“युवा तारा ज्योतिष अवार्ड “,मन्दाकिनी अवार्ड ,ज्योतिष ऋषि अवार्ड ,पशुपतिनाथ अवार्ड ,अन्तर्राष्ट्रिय खगोल माननीय अतिथि अवार्ड ,ज्योतिष भास्कर अवार्ड ,शारदा अवार्ड – 2022 “ज्योतिष रत्न”,अवार्ड , “ज्योतिष भूषण”, “वास्तु भूषण”, “इण्डो–नेपाल एस्ट्रोलोजिकल एक्सिलेन्स अवार्ड” सम्मान प्राप्त गरेका छन् । पंगेनीले ज्योतिषीय संगठन विस्तार, अनुसन्धान प्रवर्द्धन तथा युवा सहभागिता अभिवृद्धिमा उल्लेखनीय योगदान पुर्‍याएका कारण विभिन्न संस्थाबाट सम्मान प्राप्त गरेको जनाइएको छ। �

उनले दक्षिण एशियाली ज्योतिष महासंघका विभिन्न कार्यक्रम, राष्ट्रिय सम्मेलन, आध्यात्मिक सम्मेलन तथा ज्योतिष सम्बन्धी कादम्बिनीको प्रधान सम्पादक र मन्दाकिनीमा सम्पादक रहेर प्रकाशन कार्यमा समेत सक्रिय भूमिका निर्वाह गरेका छन्। संगठन निर्माण, समन्वय तथा व्यवस्थापनमा उनको दक्षता महासंघभित्र विशेष रूपमा प्रशंसित रहेको सहभागीहरूले बताएका छन्।

युवा पुस्ताका प्रेरणास्रोत

ज्योतिष क्षेत्रमा पछिल्लो पुस्ताको प्रतिनिधित्व गर्ने व्यक्तित्वका रूपमा रविन पंगेनीलाई हेरिन्छ। ज्योतिष , मनोविज्ञान , कानुन, समाज शास्त्रमा स्नातक र राजनीति शास्त्रमा स्नातकोत्तर सम्मको अध्ययन गरेका उनले परम्परागत वैदिक ज्ञानलाई आधुनिक सञ्चार माध्यममार्फत जनसाधारणसम्म पुर्‍याउने अभियानमा समेत सक्रिय भूमिका खेलेका छन्। विशेषतः युवा वर्गलाई ज्योतिष, संस्कृत शिक्षा, पञ्चाङ्ग विज्ञान तथा सनातन संस्कृतिप्रति आकर्षित गराउन उनले विभिन्न चेतनामूलक कार्यक्रम सञ्चालन गर्दै आएका छन्।

महासंघका वरिष्ठ पदाधिकारीहरूले पंगेनीको महासचिवमा निर्वाचनले संगठनलाई नयाँ ऊर्जा, अनुसन्धानमुखी दृष्टिकोण तथा अन्तर्राष्ट्रिय विस्तारको अवसर प्रदान गर्ने विश्वास व्यक्त गरेका छन्। दक्षिण एशियाली ज्योतिष महासंघले आगामी दिनमा दक्षिण एशियाका राष्ट्रहरूबीच ज्योतिषीय अनुसन्धान, शैक्षिक सहकार्य, प्राचीन ग्रन्थ संरक्षण, डिजिटल अभिलेखीकरण तथा अन्तर्राष्ट्रिय स्तरका सम्मेलन आयोजना गर्ने लक्ष्य लिएको छ। नवनिर्वाचित महासचिव रविन पंगेनीको नेतृत्वमा महासंघले नयाँ उचाइ हासिल गर्ने अपेक्षा गरिएको छ।
ज्योतिष विज्ञान, वास्तुशास्त्र, संस्कृत शिक्षा तथा सनातन सभ्यताको प्रवर्द्धनमा समर्पित पंगेनीको महासचिव पदमा भएको निर्वाचनलाई ज्योतिष क्षेत्रका लागि सकारात्मक, ऊर्जाशील तथा दूरदर्शी नेतृत्वको उदयका रूपमा हेरिएको छ।