फागुन ४/स्याङ्जा: क्लष्टर फर एकेडेमिक डेभलपमेन्ट (CAD) भीरकोटद्वारा आयोजित प्रथम जिल्ला स्तरीय सेभेन ए साइड फुटवल प्रतियोगिता सम्पन्न भएको छ।

एक कार्यक्रमका बीच माघ ३० गतेबाट सुरु गरिएको उक्त प्रतियोगिताको फाइनल फागुनको ३ गते सम्पन्न भएको थियो।

कक्षा १० सम्म अध्ययनरत विद्यार्थीहरुको खेलकुद तथा शैक्षिक उन्नतिका लागि पहिलोपटक जिल्ला स्तरीय फुटबल प्रतियोगिता आयोजना गरिएको क्याड भीरकोटका संयोजक जीवन अर्यालले बताए।

केन्द्रीय प्याब्सन पनि भूमिकाविहीन भएको र जिल्ला प्याब्सन पनि सक्रिय नभएको अवस्थामा भीरकोट नगरपालिकामा संचालित पाँच वटा निजी विद्यालयको संयुक्त पहलमा उक्त कार्यक्रम आयोजना गरिएको प्याब्सन केन्द्रीय सदस्य अमृत अर्यालले खबरकलमलाई जानकारी दिए।

कुल २५ वटा टीम सहभागी उक्त कार्यक्रममा भुपु सैनिक आवासीय मावि वालिङले सान्त्वना स्थान प्राप्त गरेको छ। तेश्रो स्थानमा कन्साइन्स आवासीय मा वि हेलुले चित्त बुझायो।

निकै राम्रो खेल पस्किएको भुम्रे मावि वालिङलाई ट्राइ ब्रेकरमा हराउँदै बालज्योति आवासीय मावि बयरघारी च्याम्पियन हुन सफल भयो।

चार दिनसम्म चलेको उक्त प्रतियोगितामा‌ प्रथम हुनेले नगद रु १५००० ट्रफी मेडल र प्रमाणपत्र, द्धितीय हुनेले नगद रु १०००० ट्रफी मेडल र प्रमाणपत्र, तृतीय हुनेले नगद रु ५००० ट्रफी मेडल र प्रमाणपत्र तथा सान्त्वना स्थान हासिल गर्नेलाई नगद रु २००० ट्रफी मेडल र प्रमाणपत्र प्रदान गरिएको थियो।

कार्यक्रमका प्रमुख अतिथि भीरकोट नगरपालिकाका नगरप्रमुख छायाराम खनालले भीरकोटका विद्यार्थीहरुको उन्नयनमा CAD ले गरेको कार्यक्रमको सह्राहना गर्दै नगरपालिकाको तर्फबाट उचित सहयोग प्रदान गर्न तयार रहेको जनाएका थिए।

समापन कार्यक्रम पानी तथा हावा हुरीको कारण बिथोलिए पनि सफल रुपमा सम्पन्न भएको खेल संयोजक रेशम देवकोटाले जानकारी दिए।

उक्त प्रतियोगिताको उद्घाटन तथा समापन कार्यक्रमको संचालन माधव गैह्रेले गरेका थिए।