असार १४/स्याङ्जा : स्याङ्जा जिल्लाको विरुवा गाउँपालिकालाई बालश्रम मुक्त गाउँपालिका घोषणा गरिएको छ।

आज एक कार्यक्रम आयोजना गरी विरुवा गाउँपालिकालाई पूर्ण रुपमा बालश्रम मुक्त गाउँपालिका घोषणा गरिएको जानकारी विरुवा गाउँपालिकाका अध्यक्ष सूर्यबहादुर कुँवरले दिए। उनका अनुसार संविधान र संघीय कानून समेतले बालश्रमलाई निषेध गरेको र बालश्रम गराउनु कानूनी रुपमा दण्डित कार्य भएकाले सोही कानूनको पालना गर्दै विरुवा गाउँपालिकाभर बालश्रम कार्यलाई निषेध गरिएको हो।

विरुवा गाउँपालिका वडा नं २ का वडाध्यक्ष तथा विरुवा गाउँपालिकाको सामाजिक विकास समिति संयोजक नोमबहादुर गुरुङको अध्यक्षतामा आयोजना गरिएको उक्त कार्यक्रममा प्रमुख अतिथिको रुपमा विरुवा गाउँपालिका अध्यक्ष सूर्यबहादुर कुँवर, अतिथिको रुपमा विरुवा गाउँपालिका उपाध्यक्ष भगवती शर्मा, प्रमुख प्रशासकीय अधिकृत भेषराज आचार्य उपस्थित थिए।

बालकल्याण परिषद्का प्रतिनिधि, गुड सेफर्ड इन्टरनेसनलका प्रतिनिधि, विरुवा गाउँपालिकाका जनप्रतिनिधि, शिक्षक, पत्रकार, समाजसेवी, स्थानीय बुद्धिजीवी, विद्यार्थी सहित करिब १०० जना उक्त कार्यक्रममा उपस्थित रहेका थिए।

विरुवा गाउँपालिकास्थित सम्पूर्ण घरधुरीमा स्थलगत अनुगमन तथा निरीक्षण गरी बालश्रम मुक्त गाउँपालिका घोषणा गरिएको उक्त कार्यक्रमका सञ्चालक दीपक ढुङ्गानाले थप जानकारी दिए।

आजैका मितिबाट यो घोषणा लागू गरिने र कहिंकतै बालश्रम गरिएको भेटिएमा कानूनबमोजिम कारवाही हुने छ।