राम बहादुर रोकाहा/स्याङ्जा : स्याङ्जाको अर्जुनचौपारीमा फागूपूर्णिमाको अवसरमा आयोजित वडा स्तरीय क्लब भलिबल प्रतियोगिता सुरु भएको छ ।

दरौँखोला युवा परिवारले हरेक वर्ष जस्तै यस वर्ष पनि आयोजना गरिएको प्रतियोगिता एक हप्तासम्म चल्ने क्लबका अध्यक्ष किरण काफ्लेले बताए । उनले अर्जुनचौपारी -१ बजारस्थित दरौँखोलाको खेलमैदानमा हुने प्रतियोगिता पोल सिस्टममा खेलाइने र वडाभित्रको क्लबभन्दा बाहिरका दुईजना खेलाडीहरु समावेश गर्न पाइने जानकारी दिए ।

अन्तर वडा क्लब स्तरीय प्रतियोगिता अन्तर्गत यस क्षेत्रकै सर्वाधिक राशिको प्रतियोगिता आयोजना गरिएको क्लबका अध्यक्ष काफ्लेले बताए । चैत्र १७ गतेसम्म चल्ने भलिबल प्रतियोगितामा शिल्ड, मेडल र प्रमाणपत्रसहित विजेताले नगद एक लाख २१ हजार १११ रुपैयाँ, उपविजेताले ८१ हजार १११ रुपैयाँ, तृतीयले ४१ हजार १११ र सान्त्वना हुने टिमले ११ हजार १११ रुपैयाँ पुरस्कार प्राप्त गर्ने खेल संयोजक खिम गुरुङले जानकारी दिए ।

उनले वेस्ट प्लेयर, वेस्ट स्पाइकर, वेस्ट सेटर, वेस्ट ब्लकर, वेस्ट डिफेन्डर, वेस्ट कुइकर र वेस्ट अनुशासित प्लेयर गरी विभिन्न सात विधामा पनि खेलाडीहरुलाई पुरस्कृत गरिने बताए ।
भलिबल प्रतियोगिताको उद्घाटन गर्दै गण्डकी प्रदेश सभा अर्थ तथा विकास समितिका सभापति प्रदेश सभासद भोजराज अर्यालले खेलका माध्यमबाट देशलाई चिनाउन सकिने तथा मानिसलाई सकारात्मक बाटोतर्फ डोर्‍याउन खेलको माध्यमले महत्त्वपूर्ण भुमिका निभाउने बताए ।

उनले यो ठाउँ साथै खेलमैदानको विकास निर्माणका लागि प्रदेश सरकारसँग आफू लड्ने बताए । उक्त प्रतियोगितामा स्याङ्जा, पर्वत र पाल्पा जिल्लाका गरी २५ क्लबको सहभागिता रहने बताइएको छ ।