स्याङ्जा/भदौ २१: झापाकोट युवा क्लबले आयोजना गरेको तीज गीत प्रतियोगितामा मनकामना महिला कृषक समूह प्रथम भएको छ। 

झापाकोट युवा क्लबले आज आयोजना गरेको दोस्रो तीज गीत प्रतियोगिता तथा हिरापाटा लिफ्टिङ खानेपानी आयोजनाको उद्घाटन समारोहमा प्रमुख अतिथिका रुपमा उपस्थित भएका स्याङ्जा क्षेत्र नं १ बाट निर्वाचित संघीय सांसद् राजु थापाले विजयी टोलीलाई नगद पुरस्कार तथा सम्मानपत्र वितरण गरे। 

देउराली आमा समूहले उक्त प्रतियोगितामा सान्त्वना स्थान हासिल गर्यो। भैरवटोल आमा समूहले तृतीय स्थान हासिल गरेको उक्त प्रतियोगितामा टीकादेवि चेलिबेटी आमा समूहले द्वितीय स्थान हासिल गरेको थियो। 

प्रथम भएको मनकामना महिला कृषक समूहले नगद रु १५००० सहित सम्मानपत्र प्राप्त गरेको थियो भने दोस्रो, तेस्रो र सान्त्वना हुने टीमले क्रमशः १००००, ५००० र ३००० सहित सम्मानपत्र प्राप्त गरे। 

उक्त प्रतियोगिताको निर्णायकको रुपमा नृत्यांगना सृजना गुरुङ र सुनिता पौडेल गौतम रहेका थिए भने कार्यक्रम सञ्चालन सूर्य जिसी र हरि अर्यालले संयुक्त रुपमा गरेका थिए।