जीवन अर्याल/जेठ १०: स्याङ्जा जिल्लाको कालीगण्डकी गाउँपालिकामा कालीगण्डकी गाउँपालिका तथा गण्डकी प्रदेश खेलकुद परिषद्को संयुक्त आयोजनामा प्रदेशस्तरीय अन्तर जिल्ला महिला/पुरुष बुद्धिचाल प्रतियोगिता सञ्चालन हुने भएको छ।
आज स्याङ्जाको वालिङमा पत्रकार भेटघाट कार्यक्रम गरी आयोजकहरुले उक्त जानकारी दिएका हुन्। गण्डकी प्रदेश बुद्धिचाल संघका अध्यक्ष युवराज भण्डारीका अनुसार कालीगण्डकी गाउँपालिकास्थित कालीगण्डकी नदीको धार्मिक महत्वको जगेर्ना गर्ने तथा कालीगण्डकी गाउँपालिकाको आन्तरिक र बाह्य पर्यटन विकास तथा प्रवर्द्धनका लागि नदीमै स्टिमरमा प्रतियोगिता आयोजना गरिएको उनले जानकारी दिए।
३० मिनेटको र्यापिड रेटिङ खेलको रुपमा ७ जना राष्ट्रिय आर्वेटरको प्रत्यक्ष निगरानीमा उक्त प्रतियोगिता यही जेठ १२ र १३ गते आयोजना गर्न लागिएको हो। आयोजकका अनुसार खेलाडीको बिमा गराइएको, प्रतियोगितामा सहभागिता जनाउने खेलाडीहरूको खाना, आवास र आतेजाते भाडा खर्च समेत व्यवस्था गरिएको जसबापत दैनिक रु १२०० रुपैयाँ प्रदान गरिने छ।
गण्डकी प्रदेशका ११ जिल्लाबाट १,१ वटा टिम र आयोजक कालीगण्डकी गाउँपालिकाको समेत एक टीम गरी कुल १२ टिमबीच उक्त बुद्धिचाल प्रतियोगितामा प्रतिस्पर्धा हुने छ। खेलाडीबाट कुनै पनि किसिमको शुल्क नउठाइएको तर कालीगण्डकी गाउँपालिकाले रु ३ लाख र गण्डकी प्रदेश खेलकुद परिषद्ले रु ३ लाख गरी जम्मा ६ लाख रुपियाँ आर्थिक व्यवस्थापन गरिएको आयोजकले जनाएका छन्।
प्रथम, द्वितीय र तृतीय हुनेलाई नगद रु ७०००, ५०००, र ३००० सहित सम्मानपत्र तथा एक वर्षसम्म देशका जुनसुकै स्थानमा बुद्धिचाल प्रतियोगिता सञ्चालन भएपनि संघको तर्फबाट आर्थिक व्यवस्थापन सहित खेलमा सहभागिताको व्यवस्था गरिएको जानकारी भण्डारीले दिए।
उक्त पत्रकार सम्मेलनमा बुद्धिचाल संघका प्रतिनिधिहरु, कालीगण्डकी गाउँपालिकाका अध्यक्ष खिमबहादुर थापा, उपाध्यक्ष तथा प्रमुख प्रशासकीय अधिकृत सहित विभिन्न ४० जना व्यक्तिहरुको उपस्थिति रहेको थियो।
प्रतियोगिता जेठ १२ र १३ गते कालीगण्डकी गाउँपालिकामा हुने छ।
