Month: ५ वर्ष अगाडि

भाद्र ९/स्याङ्जा: स्याङ्जा जिल्लाको अर्जुनचौपारी गाउँपालिकाले ‌हालैमात्र महालेखा परीक्षकको कार्यालयले देखाएको बेरुजु रकम सम्बन्धमा सामाजिक संजालमा गरिएका प्रश्न र जिज्ञासाको उत्तर आज पत्रकार र राजनैतिक दलको भेलामार्फत दिएको छ।

केही दिन यता सामाजिक संजालमा ‌अर्जुनचौपारी गाउँपालिका र यसका प्रमुख, उपप्रमुख तथा प्रशासकीय अधिकृतमाथि बेरुजुको विषयलाई लिएर विभिन्न टीका टिप्पणी तथा प्रश्नहरु तेर्साइएका थिए। ती तमाम कुरालाई ध्यानमा राख्दै आज गाउँपालिकाले भेला कार्यक्रम मार्फत यसको जवाफ दिएको हो।

नियमसंगत नभएका, पेश्की दिएर फर्छ्यौट नभएका, काम सम्पन्न नभईसकेका आयोजनाहरुका बिलभरपाई लगायतका कुरामा कागजातहरु नपुगेका जस्ता कारणले यस वर्ष गाउँपालिकामा देखिएको बेरुजु जिल्लामै अग्र स्थानमा थियो।

बेरुजुका विषयमा उठेका प्रश्नहरुको जवाफ दिँदै गाउँपालिका अध्यक्ष दीर्घनारायण अर्यालले बेरुजु देखिँदैमा भ्रष्टाचार नै गरेको भन्ने नहुने तर प्रकृयागत कुरामा कतिपय तालमेल नमिल्दा यस्तो समस्या देखिएकाले आफूले तुरुन्त यो समस्या समाधान गर्न उचित पहल गर्ने आश्वासन दिएका थिए।

गाउँपालिका उपाध्यक्ष चिनमाया गुरुङले पनि न्यायिक तथा अन्य विषयमा आफूले ख्याल राख्दाराख्दै पनि यसरी बेरुजु देखिन गएकाले आउँदा दिनहरुमा आफ्नो भूमिका अझै सशक्त बनाएर लैजाने प्रतिबद्धता व्यक्त गरिन्। बेरुजु सम्बन्धमा सर्वसाधारणको गुनासो र प्रतिक्रिया जायज हुने तर यही कारण आफूलाई व्यक्तिगत लाञ्छना लगाउँदा चित्त दुखेको उनको भनाइ थियो।

प्रशासकीय अधिकृत कमल गौतमले देखिएको बेरुजुमध्ये केही शीर्षकको रकम उठाइसकिएको र आफू मातहतका कर्मचारीलाई थप समन्वय गराउँदै आउँदा दिनमा यो समस्या न्यूनीकरण गर्न सक्दो कोसिस गर्ने जनाएका छन्।

बेरुजुका विषयमा नेपाली कांग्रेसका अर्जुनचौपारी गाउँपालिका सभापति बोधनारायण रेग्मी, नेकपा एमाले अर्जुनचौपारी कमिटी अध्यक्ष मोहन अधिकारी, नेकपा माओवादी केन्द्र अचौगापा कमिटी इन्चार्ज तथा पत्रकार अर्जुन काफ्ले, जनशक्ति पार्टीका अध्यक्ष भीमबहादुर गोदार, नेपाल पत्रकार महासंघ स्याङ्जा शाखाका अध्यक्ष श्रीकृष्ण सिग्देल लगायतले आफ्नो धारणा सार्वजनिक गरेका थिए।

सुरक्षाकर्मी, राजनैतिक दलका प्रतिनिधि, राजनैतिक दलका भातृ संगठन संयोजक, पत्रकार लगायत करिब ४० जना सम्मिलित उक्त कार्यक्रमको संचालन प्रशासकीय अधिकृत कमल गौतम र अध्यक्षता दीर्घनारायण अर्यालले गरेका थिए।

साउन ३२/स्याङ्जा: स्याङ्जाको अर्जुनचौपारी गाउँपालिकामा अवैध रुपमा नदी उत्खननमा संलग्न रहेकालाई प्रहरी चौकी अर्जुनचौपारीले कारबाही गरेको छ।

अवैध रुपमा नदी दोहन कार्यमा संलग्न रहेको एउटा डोजरलाई कारबाही गरिएको हो । सम्राट कोहिनुर कन्स्ट्रक्सन प्रा.लि.को नाममा रहेको उक्त डोजर यस पालिकाको वार्ड न.- ३ सहरेस्थित दरौँखोलामा अवैध रुपमा नदी उत्खनन कार्यमा संलग्न रहेको प्रहरी चौकी अर्जुनचौपारीका प्रमुख असई लिलामणी उपाध्यायले जानकारी दिनुभयो । उहाँका अनुसार रातको समयमा अवैध रुपमा नदी उत्खनन गरी चोरी निकासीमा डोजर प्रयोग गरिएको आधारमा उक्त कन्स्ट्रक्सन कम्पनीका संचालकहरुलाई कारबाही स्वरुप रु.२५ हजार जरिवाना गरी छाडिएको हो ।

अवैध रुपमा नदीजन्य पदार्थहरु चोरी निकासी नै गरेको ठोस प्रमाण नरहेपनि उक्त कन्स्ट्रक्सन कम्पनीको नाममा रहेको डोजर प्रयोग गरी थुपारिएको बालुवाको आधारमा जरिवाना तिराई कारबाही गरिएको अर्जुनचौपारी गाउँपालिकाका अध्यक्ष दीर्घनारायण अर्यालको भनाइ छ । यसै विषयमा स्थानीयले भने ठुलै नेताका सहयोगीहरुको सपोर्ट पाएर नै रातको समयमा अवैध रुपमा नदी उत्खनन कार्य गरिएको बताएका छन्। ।